Aİ Ermənistandan idxala gömrük rüsumlarını iki il müddətinə dayandırıb

Avropa İttifaqı (Aİ) Şurası Ermənistan mənşəli məhsullar üçün müvəqqəti ticarətin liberallaşdırılması tədbirlərinin üzv dövlətlər tərəfindən rəsmi olaraq təsdiqləndiyini açıqlayıb. Qəbul edilən tənzimləmə ilə Ermənistanın Aİ-yə ixracının təxminən 80 faizi liberallaşdırılacaq və bəzi kənd təsərrüfatı məhsulları da daxil olmaqla, müxtəlif idxal mallarına gömrük rüsumları 2 il müddətinə dayandırılacaq.

Bəyanatda bildirilib ki, bu müvəqqəti tədbirlər Ermənistan və Aİ arasında ticarət axınını dəstəkləmək və gücləndirmək məqsədi daşıyır. Bununla belə, bildirilib ki, Ermənistandan idxal Aİ istehsalçılarına mənfi təsir göstərərsə, İttifaq bazarını qorumaq üçün tədbirlər görülə bilər.

Daha əvvəl Avropa Parlamenti (AP) tərəfindən təsdiq edilmiş bu tənzimləmə, Aİ Şurası tərəfindən qəbul edilərək qanunvericilik prosesini tamamladı. Reqlamentin Aİ-nin Rəsmi Jurnalında dərc edildiyi gündən qüvvəyə minməsi planlaşdırılır və 2 il müddətində tətbiq olunacaq.