Иран АКШнын Уран байытуу талаптарына түзөтүү киргизди

Анкара

Ирандын тышкы иштер министри Аббас Эракчи MSNBCнин Morning Joe программасында Ирандын ядролук программасы боюнча Америка Кошмо Штаттары менен жүргүзүлүп жаткан сүйлөшүүлөрдүн учурдагы абалын баалады.

Эракчи, АКШ жана Израиль медиасындагы дооматтарга карабастан, АКШ Ирандан уранды байытуу иштерин толугу менен токтотууну талап кылбаганын баса белгиледи.

Эракчи, "АКШ байытуу иштерин толугу менен токтотууну талап кылган жокпу?" деген суроого "Ооба" деп жооп берип, Ирандын ядролук программасы толугу менен тынчтык максатта болушу жана ушундай бойдон калышы үчүн иштеп жатышканын билдирди.

Ирандын уранды байытуу иштерин бир нече жылга токтотууну сунуштаганына байланыштуу дооматтарды четке каккан Эракчи, бул боюнча спекуляциялар чындыкка дал келбестигин айтты.

Эракчи, Вашингтонго ядролук келишимдин долбоорун сунуштай турганын жана "Мүмкүн болгон келишимдин долбоорун АКШдагы тарапташтарыма сунушташым керек. Ал кийинки бир нече күндө даяр болот деп ойлойм жана акыркы бекитүүнү алгандан кийин Стив Уиткоффко өткөрүп берем." деди.

Келишим адилеттүү жана тең салмактуу болушу керектигин баса белгилеген Эракчи, бул шарттар аткарылганда кыска убакытта келишимге жетишүүгө болорун айтты.

АКШнын аскердик коркутууларына да токтолгон Эракчи, "Ирандын ядролук программасынын аскердик чечими жок. Өткөн жылы чоң чабуулдар уюштурушту, илимпоздорубузду бутага алышты, бирок программаны токтото алышкан жок. Дипломатия - жалгыз чечим, ошондуктан АКШ сүйлөшүү үстөлүнө кайтып келди. Биз согушка да, тынчтыкка да даярбыз." деп билдирди.

Программа алып баруучусунун, "Президент Трамп бул программаны көрүп жатат. Президент жана Конгресс мүчөлөрүнө билдирүүңүз кандай?" деген суроосуна Эракчи, "Мурдагы АКШ администрациялары бизге каршы согуш, санкциялар жана көптөгөн аракеттерди жасашты, бирок эч бири ийгиликтүү болгон жок. Иран элине урмат менен мамиле кылсаңыз, биз да ошондой жооп кайтарабыз. Болбосо күч тили менен жооп беребиз." деп жооп берди.