Казакстанда машыгуу учурундагы кырсык: 9 жоокер каза болуп, 7 жоокер изделүүдө

Казакстанда деңиз күчтөрү тарабынан Актау шаарынан болжол менен 43 километр алыстыкта жүргүзүлгөн машыгууда аба ырайынын кескин начарлашы жана шамалдын күчөшүнөн улам деңизге сүйрөлгөн 19 аскерден 9у каза болду. Казакстандын Коргоо министрлигинен берилген маалыматта издөө-куткаруу иштеринин натыйжасында 3 аскер куткарылып, дайынсыз жоголгон 7 аскерди издөө иштери уланып жатканы билдирилди.

Куткарылган аскерлерден биринин ооруканага жаткырылганы билдирилип, каза болгон аскерлердин үй-бүлөлөрүнө жана жакындарына көңүл айтып, аларга керектүү бардык жардам жана колдоолор көрсөтүлө турганы белгиленди. Министрлик жаңы маалыматтар такталгандан кийин коомчулук менен бөлүшүлөрүн баса белгилеп, коомчулукту расмий булактардан алынган билдирүүлөрдү гана кароого чакырды.

Кырсыктан кийин Казакстандын премьер-министри Олжас Бектеновдун тапшырмасы менен окуянын себептерин иликтөө үчүн өкмөттүк комиссия түзүлдү. Премьер-министр Бектенов комиссияны жетектеген вице-премьер-министр Канат Бозумбаевге тез арада окуя болгон жерге барып, жоокерлердин өлүмүнүн себептерин ар тараптуу иликтөөнү жана каза болгондордун үй-бүлөлөрүнө керектүү колдоо көрсөтүүнү тапшырды.