Түркия менен Судандын ортосунда билим берүү тармагында зор кызматташтык: Министр Юсуф Текин судандык кесиптеши менен жолугушту

Улуттук билим берүү министрлигинин (MEB) расмий билдирүүсүнө караганда, улуттук билим берүү министри Юсуф Текин Судандын билим берүү министри Тухами Эл-Заин Хажар жана аны коштогон жогорку деңгээлдеги делегацияны Анкарада кабыл алды. Дос жана боордош эки өлкөнүн тамыры терең карым-катнаштары талкууланган жолугушууда билим берүү тармагында жасала турган стратегиялык кадамдар жана биргелешкен долбоорлор ар тараптуу бааланды.

Министр Текин Түркиянын билим берүү көз карашын бөлүшүп, эл аралык аренадагы ийгиликтерге көңүл бурду.

Билим берүү системасындагы инклюзивдүүлүктүн маанилүүлүгүн баса белгилеген Текин ар бир адамдын баалуулугуна көңүл бурган билим берүү моделин жактады.

Студенттерге теориялык эмес, практикалык билим берүүнүн маанилүүлүгүнө токтолгон министр Текин жаңы муундун окутуу методологияларын айтып өттү.

ФЕТӨ мектептеринин өткөрүлүп берилиши жана тамыры терең бир туугандык байланыштары

Жолугушууда министр Юсуф Текин Түркия менен Судандын ортосундагы достук жана боордоштук байланыштарынын бекемдигине токтолуп, 2017-жылы Судандагы ФЕТӨ мектептерин Түрк Маариф Фондуна (TMV) өткөрүп берүү учурундагы чечкиндүү жана аяр мамилеси үчүн конок министр Хажарга ыраазычылыгын билдирди. Кесиптик жана техникалык билим берүү, мугалимдерди даярдоо программалары, санариптик инфраструктураны модернизациялоо жана Судан тил борборунда түрк курстарын ачуу сыяктуу маанилүү тармактарда ар кандай колдоо көрсөтүүгө даяр экендиктерин билдирди. Түркиянын президент Режеп Таййип Эрдогандын жетекчилигинде билим берүү тармагында чоң төңкөрүш жасаганын белгилеген Текин: «Судандык боордошторубуз үчүн бардык тажрыйбабызды жана колдообузду мобилизациялоого даярбыз»,-деди.

Куррикулумду реформалоо жана PISA ийгилиги столдо

Министр Текин Судандын билим берүү программасында жасоону пландаган жаңылоолордун тарыхый кадам болоорун белгилеп, Түркиянын акыркы мезгилде билим берүү программасында радикалдуу өзгөрүүлөрдү жасаганын эске салды. Бул реформалардын оң натыйжаларынын эл аралык аренада катталганын белгилеген Текин : «PISA баллдары жарыяланды, Түркия баардык тармакта баллын жогорулаткан жалгыз OECD өлкөсү болду»деп Түркиянын билим сапатынын глобалдык өсүшүнө көңүлдөрдү бурду. Текин эки өлкөнүн ортосундагы билим берүү өнөктөштүгүн расмий жана мыйзамдуу негизге салуу үчүн кеңири түшүнүшүү меморандуму даярдалып жатканын кабарлап, талкууланган бардык кызматташтык темаларынын бул келишимге киргизиле турганын билдирди.

Судан Түркиянын билим берүү жана санариптештирүү тажрыйбасын үлгү катары алды

Судандын билим берүү министри Тухами Эль-Заин Хажар кабыл алынганына канааттангандыгын билдирди жана Судан үчүн эң башкы приоритеттин кесиптик жана техникалык билим берүүнү өнүктүрүү экенин баса белгиледи. Түркиянын бул тармактагы эбегейсиз билиминен жана тажрыйбасынан пайдаланууну каалашкандарын белгилеген конок министр, кызматташтыктын өзгөчө санарип технологиялар жана билим берүүдөгү санариптештирүү процесстеринде өтө маанилүү экенин айтты. Судандык мугалимдердин санарип жана электрондук платформалар аркылуу Түркияга келип, педагогикалык билим алышын максат кылгандарын белгилеген Хажар түрк тилин окутууну өз өлкөсүндө жайылтууну каалагандарын айтты. Суданда ишке ашырыла турган окуу планы реформасы үчүн Түркия менен биргелешкен жумушчу топ түзүү талабын министр Текинге да жеткирди.