Starbucks ABŞ və Kanadada 250 mağazasını bağlamaq qərarına gəlib

Qəzzada törədilən qırğınları dəstəklədiyi səbəbiylə dünya boyu boykot hədəfi olan qəhvə şəbəkəsi Starbucks, ABŞ və Kanadadakı mağazalarında geniş tənzimləmə aparır. Şirkət aşağı nəticə göstərən 250 filialını bağlayaraq öz mağaza şəbəkəsini yenidən strukturlaşdırmaq və resurslarını daha yüksək performans göstərən filiallara köçürməyi hədəfləyir.

Şimali Amerikada təxminən 18 min filialı olan Starbucks-ın bağlamağı planlaşdırdığı 250 mağaza ümumi şəbəkəsinin təxminən 1 faizini təşkil edir. Şirkət rəhbərliyi bu addımı satışları və gəlirliliyi artırmaq strategiyasının bir hissəsi kimi görsə də, gələcəkdə daha güclü müştəri təcrübəsi olan mağazalara üstünlük veriləcəyini bildirir.

Məsələ ilə bağlı işçilərə mesaj göndərən Əməliyyatlar Direktoru Mike Grams, hədəflənmiş müştəri təcrübəsinin bəzi filiallarda təmin edilə bilmədiyini bildirdi. Grams bu mağazaların müəyyən yerlərdə "məqbul maliyyə göstəricilərinin" əldə olunmadığı səbəbilə bağlanış siyahısına daxil edildiyini açıqladı.

Qısa müddətdə mağaza portfelini daraldan şirkət uzun müddətdə yenidən böyüməyi planlaşdırır. Bu baxımdan, Starbucks 2028-ci maliyyə ilində təxminən 400 xalis yeni şirkət mağazası açmağı hədəfləyir və uzunmüddətli perspektivdə təkcə ABŞ bazarında ən azı 5 min yeni mağaza açmaq potensialını nəzərdə tutur.