Iroq va Quvayt yechimini kutayotgan masalalar boʻyicha qoʻshma ishchi guruh tuzdi

Iroq Bosh vaziri Ali Falih al-Zaydiy va Quvayt valiahd shahzodasi Saboh Xolid al-Hamad al-Sabah AQShning Nyu-York shahrida boʻlib oʻtgan Birlashgan Millatlar Tashkilotining (BMT) 81-Bosh assambleyasi doirasida uchrashib, ikki davlat oʻrtasida yechim kutayotgan masalalarni hal qilish uchun qoʻshma ishchi guruh tuzishga kelishib oldi.

Ikki davlat tomonidan eʼlon qilingan qoʻshma bayonotda muammolar qardoshlik, yaxshi qoʻshnichilik va mushtarak manfaatlar ruhida hal etilishi taʼkidlandi. Taʼkidlanishicha, tuziladigan qoʻshma ishchi guruh yechimini kutayotgan masalalarni koʻrib chiqib, yoʻl xaritasini aniqlaydi va eng kech 30 kun ichida oʻzining qoʻshma tavsiyalarini har ikki davlat rahbariyatiga taqdim etadi.

Ishlar Bagʻdod va Quvaytda navbatma-navbat amalga oshiriladi

Bayonotda qoʻshma ishchi guruh oʻz vazifalarini bajargunga qadar Bagʻdod va Quvaytda navbatma-navbat yigʻilishlarini oʻtkazishi bildirildi. Har ikki davlat ham jarayonni har tomonlama qoʻllab-quvvatlashi taʼkidlangan boʻlsa-da, tashkil etiladigan guruh qanday masalalar ustida ish olib borishi haqida batafsil maʼlumot berilmagan.

Ikki davlat oʻrtasidagi munosabatlar tarixi

Iroq va Quvayt oʻrtasidagi diplomatik aloqalar 1990-yildagi Fors koʻrfazi urushi tufayli uzilgan va Saddam Husayn rejimi agʻdarilganidan keyin 2003-yilda qayta tiklangan.

Diplomatik munosabatlar qayta tiklanganiga qaramay, ikki davlat oʻrtasida umumiy neft quduqlari, quruqlik va dengiz chegaralarini chizish, Fors koʻrfazi urushida asirga olingan va bedarak yoʻqolganlarning ahvoli kabi muhim masalalar yechimini kutmoqda.